بحبها
ولا كنتش اعرف مرة حتى اسمها
ولا كنتش أعرف شكلها أو رسمها
لكن في لحظة قلبي اتعلَّق بها
بنت الجيران
ايوه هيه بنت الجيران
صدقوا اللي قالوا من زمان
الواد ده حَب بنت الجيران
حب كان ومازال في قلبي
رغم اللي كان
حب ساكن رغم بعدي
حب مليان بالحنان
بس ياخسارة ماكان
اتجوزت بنت الجيران
وبقيت لوحدى انكوي
بجرح الزمان
وكل الحكاية من عشر سنوات
سكنوا جيران جنبنا ومن سكات لسكات
ومافيش كلام منهم غير مرحبا وسلامات
إلا وبنية وماشية مشية الغزلان
متعطرة بياسمين وبمسك ويا ريحان
سألت أهلي.. دي تبقى مين
ردوا وقالوا بنت الجيران
تحت العباية لمحتها
لكن ماشفتش وشها
ولا حتى شعرة من ضفاير شعرها
لكن في مرة صادفتها
وسمعت كلمه من كلامها
وشفت مرة حسنها
حسيت في قلبي بحبها
وكتمت حبي وقلت هيه
اللي فؤادي مال لها
عدت عليَّ أيام
ماقدرش اصارح أهلها
ولا حتى هيه كمان
ماقدرتش أطلب ودها
أصلي خجول
هوه كده معقول
مين في الزمان ده ياناس
لسه خجول
لكن قدر مكتوب
افضل كده مغلوب
وتكون لغيري مش أنا
وازاي أعيش من غير هنا
هيه اللي كانت بسمتي
وهيه المنى
هيه اللي كانت وردتي
وعطري أنا
قلت ابعد واختفي يمكن افوق
أوانسى حبي اللي كان نبض العروق
لكن قدر مكتوب
افضل كده مغلوب
ويعيش معايا حبها
عن حبها ماقدرش اتوب
ولا يوم راح اقدر ابتعد
والحب عايش في القلوب