أنا وش حيلتي والليل ما يرحم غريب الدار
يشوف من الوله كل الشوارع تندب أحزانه
ذبحه الشوق لدياره ذبحه الوجد والتذكار
يبي شوف الديار اللي بها ربعه ومسكانه
بعد ما ذاب من فرط الحنين وطول المشوار
غدى ينفخ على جور السنين غبار دخانه
يشوف إن السعد مدبر يشوف إن الزمن دوار
يشوف انه على رجوى انتظاره طال حرمانه
يبي يفلت من أشباح الحنين وكثرة الأفكار
يبي يرجع لعقله قبل لا يختل ميزانه
على وجهه من شعور الحزن ما يلفت الأنظار
يواري حزنه بصمته ولكن بان كتمانه
يشوف ان المواصل ما توقف دونه الأعذار
ولكنه رضى موته ولا يرضى بنقصانه
بعد ما ذاق من ظلم القرابة وانكوى بالنار
قبل عيشته بالغربة ولا يشعر بحقرانه