تجود القريحة وتمكن من المستور
وينبع من الوجدان ما يهزم سكاتي
احد شافني مخطي واحد شافني معذور
وأنا ما بغيت إلا هدوي ومنجاتي
ويمر العمر ما بين ضيقه وبين سرور
لكّن المصيبة يوم أنا عفت لذاتي
يا شين الشعور الي أعيشه وأنا مجبور
ويا شين الحزن كانه تنحر مسراتي
احسد الحزين الي يمثل وعاش الدور
ما مره ربع ما مر واخلف حساباتي
ظروف الزمن تطغى على الساطي المنعور
وتبطش ولا تنظر لعزمي وسطواتي
وأخاف اترك الممكن وأعود على المحظور
وتصبح صعيبة بعد هذي مراضاتي
وأنا لي زمان احس وضعي شبه مأسور
وتنازلت حتى عن بعض من قناعاتي
بداياتنا كانت محبه وصدق شعور
وهالحين أشوفك في قوايم معاناتي
وبعد مرت الأيام ومرت بعدها شهور
ليا جيت هالحينه ما تقدر مواساتي
رضيت الغياب ولا رضيت القهر والجور
لو أن الغياب أوشك يقرب نهاياتي
لا غاب الأمان الي بغيته وصرت تدور
تجي الصدة الي تبعدك عن محطاتي
ويموت الحكي والي خلاف الصدور قبور
لو أن انعكاس الصبر بين بنبضاتي
وترا كسرك الي قد جبرته وأنا مكسور
ماشوفه شفع لي وانت بيدك مداواتي