الليلة البال لا رايق ولاهو بين حيدين
والفكرة اللي تراودني شهور اليوم ملّت
شكلت في ضي مصباح الشعر كلمة وحرفين
لا شفت لمعة ثرياته ولا نجومه تدلّت
وأنا أذكر أبعد مسافة في غيابه غمضة العين
كم فكرة في محاريبي توضت ثم صلّت
وكم ليلة كنت أنا وياه خلان ونديمين
اسقيه من كاس هاجوس الخيال اللي تملّت
وتولد قصيدة ويطلع بعدها لليل فجرين
ترسم تفاصيل روحٍ من عيون الليل طلّت
يا غايبة حرريني من قيود الهجر والبين
واطفي شغف روح رغم البعد عنّك ما تخلّت
كنتي تجيني صباحات وجناحَين وبساتين
وكنتي تجيني سهر ليل وضيا نجمة تجلّت
وفراق خلان كانوا قبل فرقاهم محبين
وعناق ناس كأن أرواحهم فيهم تبلّت
واليوم أنا وين وانتي يا ملاذي صايرة وين؟!
هذا الجفا والتجاهل والقطيعة كيف حلّت؟!
مرت سنة بين يمكن ما تجين ويمكن تجين
والقافية في مفازات السهر غابت وولّت
كم هاجس مرني كم قلت له بكره وبعدين
كم لحظة في غيابك من شجر ليلي تفلّت
تحرري من سراب الما ومن كينونة الطين
وارقي مثل غيمة سارت بها الريح وتعلّت
لاصار مالي ومالك بين هالعالم عناوين
مكاننا فوق غيمة عدت العالم وزلّت
ما ودي أعيش لا رايق ولاني بين حيدين
وأراود أفكار من طول انتظار البوح ملّت!!