الحب ماهو في الرضا أو ف الزعل
ولا في لحظات الوصال وف الفراق
ولا حضن دافي ولا حلو القبل
ولا الجفا ولا التغلي والعناق
ولا كلام الشعر أو عذب الجمل
ولا الوفا والتضحية والاحتراق
ولا عيون وساع او رسمة كحل
ولا حنين ولهفة وزود اشتياق
ولا الزيادة في المشاعر والبخل
ولا التحرر والهوى والانغلاق
إحساس مثل السحر لحظة يكتمل
روحين تتوحد بدون أي اتفاق
لو بينهم فرق ومسافات ودول
تتخاطر الأرواح في وصل ووفاق
إحساس ما يفْهَمْه الا من وصل:
لين آخر أعماقه، شرب منه وذاق!