أطول من الليل.. هذا الصمت، هذا الملل
والنوم بيني وبينه ساعتين ونهار
معزول، والعزلة اللي صدق ما تحتمل..
اللي تجي لك بلا رغبة ودون اختيار
أكتب جمل في جدار الصمت وأمحي جمل
أهرب من الليل، أدور فيه درب ومسار!
أدور في داخلي مدري وش اللي حصل
وأسأل، أنا داير لوحدي أو الكون دار؟
أسأل، ومفتاح هذا الليل ما له قفل
جدار مظلم، وخلفه ليل خلفه جدار
تتأمل أعضاك كيف النبض فيها خمل
كيف أصبحت حمل فوق الحمل فوق الحصار
يحاصرك خوفك الآمن بلا خجل
ما كنك اللي رسمت العمر شمس ومدار
وفتحت للعابرين من المواجع أمل
وأهديت لأحلامهم نبض ونفَس وازدهار
هذا أنت، يسكنك هذا الارتباك الممل
لو تسكن الأرض، لو لك في سما الناس دار!
هذا المؤشر طلع، هذا المؤشر نزل
حمّاك تستوطن أطرافك مبيت ومزار
صداعك اليوم نصفي، باكر بيكتمل
تنفسك كأن ما بينك وبينه شجار
وحيد في عزلتك ما كنك عندك أهل
رحمتك يا رب من يوم الحشر والفرار
يا رب عبدك شكى لك حالته وابتهل
راضي بما تكتبه ما له بحكمك خيار