جيت في لحظة زعل والبال ضايق
والحشا فيه العتب يملا مدينة
واشتعل ما بيننا نار وحرايق
وانطفأ شمع الحنين وياسمينه
ما أعطينا لهفة اللقيا دقايق
ولا أخذنا اللي نبيه وعاشقينه
جفت عطور المحبة والحدائق..
وردها ذابل وصورتها حزينة
أذكرك تسرق من أيامك سرايق
لجل تهدي حبنا لحظة ثمينة
وأذكرك ما كنت للهجران طايق
لين شكلك الجفا ناره وطينه
قلت لك: ما كان هذا البعد لايق!
يوم كان الوصل يفتح لك يدينه
غيب، لا صار اللقا حاجز وعايق
غيب واقطع عن وعد باكر وَتِينه
غيب ما ني للهوى والحب رايق
حبنا اللي تعرفه راحت سنينه