تعبت من كيف حالك، لا تنشِّدني
بس أنت وشلون قلبك يا بعد حالي
قل لي وش علومك العذبة وتسعدني
من خَلقت الحب والغالي من الغالي
خذني لدنياك عني لين تبعدني
ابعد من اللي تطول يدين غربالي
دامك على اللي مثل صبحك معودني
ابترك اللي يشابه غربتي، خالي
خذني، ابرتاح مني معك، وافقدني
ما ودي إني معك واطري على بالي
زدني من النرجسي والا بَعَد زدني
من فتنة البابلية.. وازهل اقبالي
بجيك كلي، مثل ما كنت عاهدني
وانسى قديم الشقا، وافديك بالتالي
هاللي قبل ما تجي كنّه مجودِّني
ماني معه عنك لو طال النوى سالي
والاّ انت لابعدت طيفك للنظر يدني
واكتبك حلم ٍ يحيّر فيك عِذَّالي
واقراك، واشوفني بعيون حاسدني
واخفيك بالروح عنه.. وما تهيَّالي
إقرب، واصدق عيوني، يا مواعدني
صبح المطر، والأغاني، والمدى العالي
عاد أنت خدني معك، وعنك نشدِّني
واقول أحبك معك، واحبك لحالي