طير السعد غنى ورفرف جناحه
من يوم شفتك يا زعيم الملاحي
وطير النحس ربي من الجو زاحه
والله كتبلي راحهٍ وانشراحي
ازريت اهدي القلب واكبح جماحه
وده بسجه يم ذيك النواحي
يم الديار اللي تشافي جراحه
وشوفك يا زاهي بلبس الوشاحي
قربك هنا روحي وشوفك رباحه
وفيك الغزل يا نور عيني مباحي
ربي عطالك ثقل عقل وملاحه
وانوار خدك مثل شمس الصباحي
مطبوع اسمك في الضمير بصراحه
ثابت ولا يمحاه بالوقت ماحي
اخضعتني وأعلنت قلبي اكتساحه
هزمتني ما امديت أشهر سلاحي
الجوف سوى من هجومك مناحه
يبكي فرح من هم عدى وراحي
لا تشتكي مالوقت عسر وشحاحه
مادامني نهرٍ لوردك قراحي
الليل من دونك كثيره اشباحه
وطلتك برقٍ في دجى الليل لاحي
العين صوبك ودها باللتماحه
تروي نظرها في صباح ورواحي
طالبك لا تطلق اسيرك سراحه
مادام اسرك فيه ليه صلاحي
واليوم جانا السعد وهبت رياحه
وأعلنت مشروعي وخطه نجاحي