أنتقي في الشعر كل قافٍ نمونه
يعجب المذوقه واهل القصايد
وإن نزلت بساحته أكرم زبونه
له أقدم ما يليق من الفرايد
وعن ملاقيف العرب لا ينقدونه
له بنيت الصرح في عالي النوايد
أحشمه وآقدره وايضاً أصونه
وألبسه أصناف من در وقلايد
والشعر إحساس للي يفهمونه
به تهيض النفس وتخط الجدايد
وانت ياللي ما أعيش العمر دونه
الغلا لك كل يوم في تزايد
كل ما يرخي على الداجي سكونه
استخيلك بين جفني والوسايد
ابسم لطيفك وساله ويش لونه
يا عساه بخير في إنس ورغايد
لي سكن قلبي وشيد به ركونه
شوفته عندي غنيمه ومالفوايد
سهم حبه مرتفع ما يلحقونه
يوم سوق الغير يشكي من الكسايد
غير هذا الوقت مختله وزونه
يشغبك عمن تحب وبه تشايد
لو بغيت اسلى يجدد بي طعونه
ويشعل بصدري براكين ووقايد
الأسى والهم والنفس محزونه
والكآبه جوها طاغي وسايد
كل هذا والسبب لي تعرفونه
تنقله الشاشات ووراق الجرايد
شوف وضع الشام يشكي من السخونه
غابةٍ فيها كثيرات الطرايد
العدو متحفز وفيه الرعونه
صار لرواح البشر حاصد وصايد
والشعب عينه على الغادر يخونه
وحد منهم موقفه موقف محايد
خذني التفكير للشام وشؤونه
وله بدعت أفكار مالخاطر نضايد
والوطن يفرض علينا ان نصونه
ونرخص الأرواح له وقت الشدايد
قلت شين حرك احساسي شجونه
وادعي الله يحفظك يا دار زايد