الله على وقتٍ تزايد بغربال
وقتٍ صعيب وكله احلوم شينه
فيه الصداقه صدقها صار ميّال
يوم الرفيق يشيل حقد وضغينه
عزاه يا وقتٍ تلاشوا به ارجال
وين الصدوق الوافي يا ناس وينه!!
وين الذي للهم عن صاحبه شال
نفسه فداه وكل مافي يدينه
راح الوفا واتبدل الحال بالحال
يا اهل الوفا مات الوفا مع حنينه
انا حسبت انك على السر قفّال
صمام ما تبدي الامور الدفينه
عزاه يا قلبي على ذيك الآمال
عزاه من وقتٍ تعيسه سنينه
وقتٍ غدى راعي الردى فيه يختال
يسراه تفضح ما تقدم يمينه
يا عين هلّي غالي الدمع همال
اذا الصداقه بالمصالح رهينه
نصيحتي ياللي تبي خير الاقوال
انشد عن اخلاق المخاوي ودينه
وعليك باللي دايم الدوم مدهال
ما صك بابه عن ملا قاصدينه
الوقت ما غيّر ابد حال رجّال
الوقت ماضي والبلاوي دفينه