ما عاد لي في دار الاجواد مقعاد
ما دام تالي العمر ضاعت هقاويه
خذت الرحول اللي على ظهره شداد
واقفيت عنه وخاطري فيه ما فيه
اقفيت عنه وجرح الايام يزداد
ما كنت اظن الحب هذي مواريه
بيني وبينه الف قصة وميعاد
غير الكلام اللي ضلوعي تناجيه
للحب دربٍ بين موتٍ وميلاد
توي معك يا غاية الروح باديه
وش صار؟ مدري؟ كيف؟ وش عاد ينعاد؟
يا كثر شيٍ وسط راسي يحاكيه
على الطريق اللي برى حالي ابعاد
كن المفارق موت يقطع مساريه
شفت الجروح اللي ملت صدري جداد
كنيتها لين اظهر الدمع خافيه
بغيتها تشفي جروحي ولا فاد
بالعكس نقض غالي الدمع ماضيه
يا قلب واسمع خل عنك التوجاد
من لا يداري خاطرك لا تداريه
ما عاد لي في دار الاجواد مقعاد
لا صار تالي العمر ..ضاعت هقاويه
تركي بن
عبدالعزيز