تنهيد بيسابق صوت التكييف
إحساسك ايه
وانت بتفرد دراعاتك ع الآخر
علشان تحضنهم
وف لحظة تحس انك حاضن نفسك؟
إحساسك إيه
لما مسكت صورهم
ولقيتهم بقوا أكبر بكتير من كل هدومهم
اللى انت شاريها وقلقان
لتكون واسعة عليهم؟
إحساسك ايه
لما بتسمع صوتهم ف التليفون
وانت مكدب ودنك
ومافيش غير بسمة عبيطة على شفايفك
مش قادرة تصدق
ولا عارفة تجارى كلامهم؟
إحساسك ايه
وانت برغم البعد اللى مابينكم
شامم ريحة حكمة حزينة ف نظراتهم؟
إحساسك إيه
وانت بتندم... دلوقتى
على كل زعقيك ف وشوشهم
وانت بتتفرج على ماتش الأهلى؟
وهما بيتنططوا قدام التليفزيون
إحساسك ايه
وانت بتتدارى ف خجلك
وبتهرب من ذنب معشش جواك
من نرفزتك
علشان مش عارف تقعد مع نفسك؟
طب آديك دلوقتى لوحدك
مش طايق تقعد مع نفسك ليه؟
ومافيش ولا صوت غير صدى تنهيدك
عمال يتسابق مع صوت التكييف
مش عارف ليه تستمتع بنهائى الكاس؟
مع إن الجو هدوووووووووء ع الآخر
مش قادر تتنرفز ليه
على عفاريت الدنيا اللى بتتنطط قدام وشك
إيه رأيك دلوقتى؟
دلوقتى...
مافيش قدامك
غير حل من اتنين
ياتقوم تلحق آخر طيارة
قبل ماكل هدومهم تصغر
يا ترد عليا...
إحساسك إيه
وولادك عمالة بتكبر
وانت
ب
ع
ي
د؟!!