سوبرانو
واقف على حدود المسافة
بين غيابك...
وانفعال نبضك
بشوقك للرجوع
خايلت مشاعر غربتك
زخات وميض الإئتناس بالبوح
وانت ولاحيلتك وتر
ولاملك إيدك...
غير رماد الزكريات
والتوهة بتصارع ف رجليك التُقال
لا قدرت تفتح خطوتك
عكس اتجاه الريح
ولا راضية تعفيك غنوتك
م الدق ع الابواب
إيه اللى عجًّبك ف الغنا
خلاك تطاوع ندهة التفاعيل؟
مين اجتباك تشعل فتيل الحرف
ف جبال السكوت؟
مين استباك... خلاك شبح
راجع يقايض كلمته بالموت؟
طب م انت جربت الغنا
وعاندت لحن بيكرى ع الغنوة
لعنة نشازالمحنة والتباريح
أخدت إيه غير وقفتك
ف حضن كونشرتوالوجع؟
سوبرانو شايل
بين ضفاف حنجرته ترانيم التعب
أوركسترا الخوف والضياع
لساه وراك...
واقف بيعزف لحنك الملتاع
وانت بتشيع معاه
صمت انتحارالمعني...
على صخر الغياب!