ياااااه
اتسرق العمر بسرعة غريبة
وانا لسة ما عملتش حاجة
لسة بادور
ع اللى يورينى السكة
ويعدينى للناحية التانية من العالم
لسة باقوم الصبح برغم مرور السنوات
أنحنى على كف أبويا أبوسها
رغم انه ف عالم تانى من ستاشر سنة او اكتر
لسة لغاية دلوقتى
باتمنى أطول ترباس الباب
اللى فاصلنى عن الشارع
بس اما بافوق
وارجع احاول ابص على الباب
بالقانى
برغم الطول الفارع
مش قادر اطول القفل اللى عليه
من كتر الطول فى الجسم وايام العمر
مش قادر أميل وادخل
علشان ارتاح
م الزحمة وضجيج الشارع.