شيال
الهموم
شيال الهموم ياصغنن
والهم دا حمله تقيل
لكنك يابطل تتفنن
ازاي للحمول دي تشيل
شيال الهموم ياحنين
يابو قلب يسيع الكون
بالحب الطريق بتزين
وبالصبر دا كله يهون
شيال الهموم يامسافر
في الدنيا شمال ويمين
بتجاهد كمان وتعافر
وتقول للكريم قاصدين
شيال الهموم وياطيب
وطريقك ملان بالشوك
ولجرح الغريب بتطيب
وجراحك في يوم ماحاشوك
شيال الهموم شيال
بتنور لبلدي طريق
يابو نبع الحنان سيال
في عطشنا يبل الريق
شيال الهموم مهموم
ولكنه مايوم انهار
ومكمل طريق مرسوم
وهايوصل لأحلى نهار