رجع خلاص من السفر
وحلمه كان مابين إيديه
كان الشتا وكان المطر
آخر صور شافت عينيه
راجع ماليه الإشتياق
وخطوته بجناح تطير
نفسه يعوض الفراق
نفسه ف حاجات
وحاجات كتير
كان المعاد نفس المكان
اللي شهد أول لقاهم
والوداع
كان حاضن الحلم اللي كان
خايف عليه من الضياع
قرب كمان
وكمان كمان
لحد ماتقابلوا الوشوش
!!ماعرفتهوش
ما عرفت هوش
كان المطر بيزيد في حيرته والحقيقه مشتته
ماعرفتهوش
هل صورته دوبها مطر ليلة الشتا؟؟
ولا الزمن زود عليها كتير رتوش؟؟؟
ماعرفتهوش
قلبه انفرط ع الأرض حباته
ومين هايجمعه
والآهه سكنت ليل سكاته
ولا حد تاني ها يسمعه
ياحلم عمره اللي انكسر
ومين ياخلق يرجعه
رجع وشايل كسرته
وكام صوره دايبه من دموعه وم المطر
رجع ولملم ذكرياته كلها
في شنطة سفر