ياساكن في قلب الأماكن وراكن
وشوفتك تمللي في قلب الحدث
بتهتف بصوتك وتتحدى موتك
بوقفة صمودك قصاد الحرس
وغيرك مابان إلا لما البيان
قال دا فات الأوان ودق الجَرس
يابادر بإيدك لأول إشاره
وطالق بدمك لأول شراره
ياشارب بإيدهم لكاس المراره
وغيرك دا إسمه أنا ماعرفوش
ولا شفت وشه مابين الوشوش
ولا حد فينا من الأصل شافه
ولا مره واحده سمعنا لهتافه
بقى ضيف ودايم في كل العزايم
ونايم وقايم ف ال ستديوهات
يقول ذكرياته ويحكي حكاياته
وراسم بطولته في الحكايات
هنا دم صاحبه اللي غرق هدومه
هنا برضه صاحبه اللي ضاعت عيونه
ويكدب وماحد قادر يلومه
وكل الحقايق يلونها لونه
كأن ضميره دا هو اللي مات
يا وقت ماكان الهتاف بالحماس
وكنت بتنادي الخلاص والقصاص
وقت اما كانوا يصيدوك بالرصاص
وهو ساعتها في نوبة الخرس
وخايف الفضيحه وخايف الجُرس
وفجأه لقيته ماسك الزمام
وفي الصوره واضح وعامل إمام
وفجأه لقيته راكب الفرس
مناضل وثوري
وللخيط شبط
وانت يا إللى برصاصهم سقط
وكات مصر همك وهمك فقط
بيظهر سعادته الصح دايما
وإنت اللي دايما بتظهر غلط