سألت فين الجدع
مبقاش تشوفه العين
أتاري (صوصو) طلع
معاش بقاله سنين
الشاب ياما رزع
في ناس كتير أسافين
إبليس بذاته قلع
قبعته ليك يا كهين
ولما شافه هرع
يقرا المعوذتين
بصراحه كله شبع
ومعبي منه خزين
الحلو ياما ركع
عشان يقول بؤين
أتاري ضهره اتوجع
ما حبيبه كان شبرين
بيعبي منه السمع
ما هو أصل له ودنين
وصاحبنا ده لو شرع
أشّر كبيرنا آمين
طب لو حبيبك وقع
راح تعمل ايه يا حزين
ويقول في نفسه النتع
وانا مني فيه اتنين؟
الهيئة باشا وفرع
كفؤاد سراج الدين!!
وحقيقته عيل خرع
كان ابوه معاه قرشين
يعملي فيه سبع
رجالة في الميادين
وتلاقي زيه سلع
تلاتة بسجارتين
مشتاق حكاية ولع
تلاقاه شمال ويمن
لو خدله دور كان برع
في القاهرة تلاتين
دماغه شعر وصلع
وبرده فيه قرنين
أقطع دراعي ان نفع
في حاجة تخزي العين
الوقت فيه متسع
ممكن يبات ليلتين
قاعد هناك اترزع
يرازي في التليفون
إنتاجه لما برع
تقدر تقول صفرين
فيه ناس كتير تنخدع
بصيامه يوم الاتنين
والسبحة آخر دلع
ولا خادم الحرمين
وزمانه ده لو رجع
ياكل في ودن شاهين
شاهين ده نجم وسطع
شعره عليه فوزلين
مشتاق يا عينى اقتنع
بقرب ناس واصلين
حلمان بإسمه لمع
في سائر الدواوين
ويوم القرار ما طلع
كان نافخ البلالين
متقلش عنده صرع
بيبص إسمه فين
مشتاق يا عيني انخرع
كان أول الفاشلين
كالعادة لف ورجع
يلاقيها بس منين
يتمنى عين تنخلع
ويبقى م المديرين
يا قلب مليان جشع
بكره يتويه مترين
ملقتش عندك ورع
باي باي يا نور العين
أصل الخسيس لو وقع
بتكتر السكاكين
نكسر وراه الزلع
وبلاش نسب الدين
كان يجرى ايه لو زرع
خير يحصده المسكين
أهو شوفت يا دي الجدع
السمعة وصلت فين