بيصلوا تا يرضى عليك

بِيصَلُّوا تا يِرْضَى عْلَيْك

أَللّه.. وِبْيِنْسُوا مِينَكْ

مُرْسَلْ، وِالصَّوْت بْدِينَيْكْ

باقي، وِانْتَهْيُوا سْنِينَكْ

مُشْ جايي للصَّحْرا بَسّ

لْناس.. بْيِحْكوا بِلْسانَكْ

جايي تْكَحِّلْ عَيْن الشَّمْسْ

وِتْلَوِّنْها بْإِيمانَكْ

صُهْر نْبُوِّه، وْإِبْنِ الْعَمّ

قْداسِه بِتْزيد قْداسِه

أَعْظَمْ بَيْت.. وْأَشْرَفْ دَمّ

زَرْعُوا التَّقْوَى بْأَنْفاسي

يا عَلِي.. يا عالي دَوْمْ

بِعْيُون الرَّبِّ الْجَبَّارْ

لِمّن صُمْتْ.. اسْتَحْلَى الصَّوْمْ

يِفْطَرْ عَ إِيدَيْك.. نْهارْ

يا قِدِّيس القِدِّيسينْ

يا مْرَجّعْ يَسوع الْحُبّ

وِحَّدْت بْكِلْماتَكْ دِينْ

فِرْحِتْ فيه عْيُون الرَّبّ

كِلّ النَّاس اعْتَرْفِتْ فيكْ

وْمِتْلَكْ ما عِرْفِتْ هَ النَّاسْ

بِتْسامِحْ يَللّي بْيؤْذيكْ

وِبْتِعْطي مِنْ دون قْياسْ

شو الإِنْجيلْ؟!.. وْشو الْقُرْآنْ

كتْب.. وْنِزْلِتْ كِرْمالي

فِسَّرْتا، قلتْ: الدَّيّانْ

واحِدْ.. تا تْرَيِّحْ بالي

مُشْ خايِفْ مِنْ نارو.. كنْتْ

وْلا طمْعان بْجَنَّاتو

شِفْتُو مْحَبِّه.. مِتْلَكْ إِنْتْ

حِبَّيْتو هُوِّي بْذَاتُو