إنت رفيقي وين ما بروح

إنت رْفيقي، وَيْن ما بْروحْ

طَيْفَكْ عَنْ عَيْني ما غابْ

ساكِنْ بِالْقَلْب وْبِالرُّوحْ

بْآيات انْسَكْبِتْ بِكْتابْ

إنْت الْخَيّ، وْإِنْت الْبَيّ

وْرَبِّ الْعَيْلِه الْ عِنْدا رَبّ

كلّ ما مْشينا شْوَيِّ شْوَيّ

بْتِحْرِسْنا بْعَتْماتِ الدَّرْبْ

يا عايِشْ بِصْلاتي دَوْمْ

حْرَقْتِلَّكْ عُمري بَخُّورْ

وْكِلّ ما بْيِنْقَصْ عُمْري يَوْمْ

الْعُمْر بْيِطْوَلْ فيك دْهورْ

لَيْش بْحِبَّكْ؟! حُبَّكْ مَجْدْ

بْيِرْفَعْني لأَعْلى مْنِ الصَّوتْ

بْيِنْقِلْني عَ مْطارِحْ بَعدْ

مُشْ قادِرْ يُوصَلاّ الْمَوْتْ

قاتَلْت الباغي.. وِرْبِحْتْ

تا تْرَيِّحْنا بِجْهادَكْ

ما فِهْموا الصَّيْحَه اللّي صُحْتْ

قَتْلوكْ.. وْقَتْلوا وْلادَكْ

يا بُو الْحَسَنْ.. إِبْنَكْ ماتْ

وْإِبْنِ التَّاني بَكَّاني

تْلاتِه ضَحُّوا بِالدَّمَّاتْ

كْرامِةْ حَقِّي الإِنْساني

ذُرِّيتَكْ نُخْبِةْ أَبْطالْ

ضَحُّوا، بَعْدَكْ، بِشْبابُنْ

قَتْلوهُنْ.. قَتْلوا أَطْفالْ

تْعَمَّدْ بِالدَّمّ تْرابُنْ

زَيْنَبْ تِبْكي.. وَيْنِ الْعَدْلْ

وْجِدَّا الرَّسول المُخْتارْ؟

يَللِّي "بْإِسْمُو" اغْتالوا النَّسْلْ

زْغِيرِه.. لَوْ يِنْزَتُّوا بْنارْ