امي الله يحييها ويسعد مساها
شرّفت دارنا والبيت نوره تلالا
أشرقت ظلمة النفس وتجلى ضياها
والخواطر بحضرتها تبختر جمالا
في حضور أمي الاشواق تسمو مداها
والمشاعر تغني بهجةً وابتهالا
لو بغت نور عيني ماتردّدت جاها
لو بغت كل عمري تم ماقلت لالا
ماعبرنا الطريق إلا بنعمة دعاها
لين صرنا بفضل الله سواة الجبالا
دايم تقول وتردد وترفع يداها
الله يعزّك ويحفظك رب الجلالا
لو عملنا وقلنا مالحقنا جزاها
ارضعتنا الكرم والطيب نبع زلالا
يوم أبونا توفى في بداية صباها
ورثت الفقر مع بنت وثلاثة عيالا
استعانت بمولاها يسدّد خطاها
زادها الفقر قوة والعذاب احتمالا
من شتات وغثا الايام لمّت قواها
سهرت وتعبت وشقيت وربّت رجالا
كانت تشوف في ضحكة ولدها دواها
وان تعب تتعب وتسهر ليالٍ طوالا
ان زعل واحد منّا تعكّر صفاها
وان فرح تشعل الدنيا فرح واحتفالا
امّنا مدرسة تعليمنا في حماها
امّنا كنز مكسب ثروه وراس مالا
واجب انّا نقدّرها ونشكر عطاها
مابقي غير هيل في حلوق الدلالا
نسأل الله لها حسن الختام ورضاها
من رضاها رضى الرحمان جل وتعالى