الوقت يجمع ويفْرق والسواير تسير
والحبّة العايرة ماهي لماعونها
وانا على سجّة الهاجوس مالي خشير
اكتب بيوتي واقنّدها بمضمونها
ياطير وش قيمة الجنحان لو ماتطير
اليا الديار امحلت واليا انكفا لونها
لاتنتظر تزهر الواحة ويصحى ضمير
الغيمة اللي بكور الغيث فردونها
العيد بيّن ونعرف ليلته من عصير
واهل الفراسة مع الخبرة يعرْفونها
والكذب مهما زمانه طال حبله قصير
الجمة الراهية تلقاه من دونها
عاد انت ياللي على نبضات قلبي تغير
حصّنت نبضات قلبي عنك فحْصونها
شكرا على الجرح!!ماقصَرت خيرك كثير
اثرالجمايل كذا العالم يردونها؟؟
اسواتك اسواةالاعمى اللي يقود البصير
قصتك ياصعبها عندي وياهونها
ليه الوفاء عند بعض الناس قطعة حصير؟
حسب الطلب تفرش وفي ساع يطوونها!!
ماني مجازيك وابذكرك دايم بخير
مثلي يحافظ على الاسرار ويصونها