لو بعينك ليا مريت ردّ السلام
سنّة الهادي وشرع العليم السميع
وين رايح تبختّر مثل بدر التمام
القمر لويجي جنبك صراحة يضيع
وانت تمشي تهادى مثل مشي الغمام
لاثقيلٍ ثقيل ولا سريعٍ سريع
غصن وردٍ تهصّر كن مابك عظام
خايف الشمس لاتحمى عليك وتميع
ان توجهت قبلة عطرك يفوح شام
خافوا الله فينا عاد وامشوا جميع
كل خطوة غرور وكل نظرة سهام
شف ضحايا عيونك كم صويب وصريع
ليه مافهّموك ان التجنّي حرام
وان قتل البني آدم رهيب وشنيع
تبّت إيد التغلّي والدّلع والخصام
اثر ماللهوى والحب عندك شفيع
راح مركب غرامي في بحورك حطام
مدّ حبّك فظيع وجزر حبّك فظيع
من غرق في بحر عينك عساه الرحام
لامكان لدخيل ولامقام لمنيع
راهن احلام عمري تحت حدّ الحسام
كن قسوتك ذيب وامنياتي قطيع
مير طبعي عنيد ولااقبل الانهزام
لاتحسب انّي اتوه بعجاجك واضيع
ودّي اعاملك بالطيب والإحترام
وارفعك للكواكب فالمكان الرفيع
ودّي اصوّر الشمس وخيوط الظلام
وازرع الشوق لك في كل وادي وريع
لجل ازخرف لك اشعاري بعذب الكلام
واقطف احلى الزهر من جال روضٍ بديع
انته اسمك على صدر القصيدة وسام
مزهرية وباقة من ورود الربيع