لا تحبسين الصبح وانتي شعاعه
ولا تبخلي بكلمة وعمري صداها
ياللي هواك يمرّني كلّ ساعة
ياللي جبينك نور شمسٍ بداها
قلبي اللذي يتبعْك حبٍ وطاعه
وان ضاع قلبي في عيونك .. فداها
والحبّ والله للقلوب الشجاعة
قلوب تطوي بالمحبة مداها
تصبر على ملك والهوى وانتزاعه
تظمى وترجي من المحبّة نداها
لو انكرك يالحبّ مالي استطاعه
قلوبنا والله لبعضها هداها
وان مرّ سمعك حكْي زيف واشاعه
ضحكي وخلّي للعواذل رداها
لي مركبٍ ما ضيّعك في شراعه
ابحر لعينك واستجيب لنداها
عينٍ تعزّ المهتوي لارتفاعه
تحفظ حبايبها وتجرح عداها.