فالشوارع طاحت احلام

فالشوارع طاحت احلام

مدْري والله هو نسوها او رموها اصحابها؟

امشي وابعد في كفوفي هالزحام

ابعد اجسادٍ من احلام

حلم ينطر صاحبه وطال انتظاره

وحلمٍ تعلق فعامود الانارة

حلم طايح مثْل اوراق الخريف

حلم طايح باخر اعتاب الرصيف

يلفظ انفاسه الاخيرة

من عذابه من يجيره؟

فالشوارع دمْع هام

دوّر عيونٍ او عيونٍ تدوره

فالشوارع نجم نام

ما لقى عاشق ولا ليلٍ ينوره

امشي وابعد في كفوفي هالزحام

ابعد اجسادٍ من احلام

فالشوارع كانت اثار الخطاوي

بين فرقا وبين وقرْب

فالشوارع تركض ظنون الهقاوي

وتعبت طاحت على الدرْب..

هذا وجهٍ ضايعه منّه عيون

وهذا ذهنٍ شارده عنّه ظنون

هاذي كفٍ فارقت بالدرب كفْ

وهذا جفنٍ في ضياع العمْر رف..

يالوجوه الطايحه

ردّي لاصحابك ملامح

يالنجوم الطايحه

ليلنا للنور طامح..

امشي وابعد في كفوفي هالزحام

ابعد اجسادٍ من احلام

الشوارع كلها ضيٍ ونور

يا ترى الظلمة منين؟

ليلنا والله شعور

ليلنا دايم يبين..

مشكلة لا صار في هالعين ليل

لو نويت اشعل ظلامي مالي حيل..

صوت يهمس باول الشارع يقول:

اشعل همومك تلاقي الدرب فرح

صبّ ليلك في مدى النور ويزول

صوت يهمس لا تزيد الجرح جرح

امشي وابعد في كفوفي هالزحام

ابعد اجسادٍ من احلام