سلامي لعينٍ تلفّت عليّه
سلْمي علي للحبّ يا عذبة القد
مدّيت كفّي لين طاحت يديه
واهديت لك ورد وسقيتيه بالصد
ولا مات وردي احفظي المزهرية
يمكن تذكْرك ما بقى لي من الود
مرّت سنة وفاقد من الصبح ضيّه
وانتي مثل هالبحْر لك جزرٍ ومد
وياخوفي مالي بمركبي مقدرية
ابحر بحورٍ بالهوى ريحها اشتد
ياللي كفوفك في جروحي وفيّة
حبيبتي ماني عدوٍ ولا ند
لكن مسافر تحْت رمشك وفيّه
عابر رمال الجيد وازهار هالخد
وانتي العمر وانتي ظروفي العصية
وانتي السما وادري السما مالها حد
ليلك ابد ماله على النور نيّة
مديت نوري في ظلامك ولا امتد
ملّ الهوى وتعبت اكون الضحية
حبل المودّة يتقطّع لو اشتد
مابي الهدايا دام صدّك هدية
ومابي الرسايل كان صمتك لها رد
وان كان نفسك من غرامي خليّة
برحل ورى عزّة فوادي ولا بد