صرخةٍ تسكن بصدري الف عام
رغم هذا ما سمعها احدٍ ابد
صرخةٍ تعبر مسافات الظلام
تملي الارض بمداها وارتعد
شقت صدور السحايب والغمام
حسّها باقي على طول الامد
الحزن طفلٍ ترك صدري حطام
من يردّه لا تجبّر واستبد
يضرب ضلوعي وخلاّها هدام
ولا تعب طاحت كفوفه وانهمد
للحزن وجهٍ يعيي الابتسام
وللحزن كفٍّ مع جروحي اتحد
عاشت الدنيا ومتنا بالغرام
كلّهم راحوا سرابٍ وابتعد
ما بقى صاحب ينادي بالهيام
ليه خنّا وليه نوفي بالعهد
كلّ كلمة كذب توديع وسلام
بترك الدنيا واخلّي هالوعد
ضايعه الخطوه وحتى القلب هام
فزحمتي اصرخ ولا حولي احد
هذا ثوبي هذا لحمي من العظام
بسألك يالجرح وش باقي بعد
غير دمعة تكسر نفوس الكرام
وغير صرخة توصل القلب اللحد
صرخةٍ اعلى من حروف الكلام
رغم هذا ما تعدّت هالجسد.