خبّروه اللي نشد واللي سأل
مالنا أرضٍ ولو ننوي وقوف
مالنا عينٍ تصبْ دمعٍ همل
ومالنا نجمٍ نمنيه ونشوف
كلّ شيْ مثل الزمن لا مرْ .. رحل
كلّ شيٍّ نعشقه يسري ويطوف
غربةٍ فقلوبنا .. وخوف ووجل
ولو سألنا واحدٍ قلنا ظروف
لو قضبته هالامل طاح الامل
طاح من رعشة يديني والكفوف
وما لقيتك يا مكاني والمحل
كلّ أرضٍ كانت رياح وشعوف
وكلّ شمسٍ صابها منّي الملل
فجوفي ليل وما تطول الشمس جوف
وكلّ وجهٍ لي تبدّى وامتثل
مثْل غيره بالملامح والوصوف
وكلّ دربٍ لو مشيته .. ما اكتمل
ابني الليل وهدمني الصبح .. خوف
همّ قلبي من امانيه انخذل
وليت لي همٍ وتحمله الكتوف
ما يهمّ اللي رضى واللي زعل
الزمن ساري وكلْ شمسٍ كسوف
وما يهمّ اللي تمايل واعتدل
كلّ قلبٍ بالمقاديير محذوف
ولا يهمّ اللي مضى واللي حصل
في عيوني ما غدى بالشوف .. شوف
يا جروحي اللي تعيّي تندمل
اعتقيني امّا حياةٍ أو حتوف.