الدرب ريح
وتعبت اطيح
تعبت اطيح وما اللقى قاع
تعبت اكون انا الظلام
اللي يدور له شعاع
تعبت اكون انا الكلام
اللي يدور له شفاه!
برد وشتات
زحمة ومسافات
جمعتها ب صوت
واخاف لو يخونني الموت
وما يمرنّي
وانا اعرفه
ياما ليالي هدّني..
قابلته مرّه
له وجْه من دمّ وضباب
واقف وله ظلً كبير
هقيته اكبر!
ما كان جارح مثل ما قال الصحاب
ثياب رثّه وجالسٍ على حصير
لو اذبحه ظنّي ابقدر!
ابعتذر على السواد
لكن جبرني هالبعاد
اكتب قصيدي من رماد!
النجم والقمرا سكاكين
لو شفتهم صاح النظر
وهذا الزمن مسكين
الناس تجرح بعضها وتشكي العمر!
صوت المطر
يشبه بكا طفلٍ يتيم
يطيح من صدر السما
ويصحي الهمّ القديم
ودمع الطفل يوم ارتمى
تناثرت ملامحه على الثرى
من يجمع حطام الطفل؟
ويردّ دمعه لو همل؟
يبكي وتمسح همّه كفوف الكرى
امسح دموعك يا طفل كلٍ سرى!
ودي ولو اشيل جلدي من العظام
واصير شي غير الجروح
ودّي ولو اذوب بانفاس الظلام
كل ما دعاني النور اركض له واروح
يا سيّدي
وضحكاتنا اللي شرتنا بايعة
منا سرقتها هالسنين!
يا ترى
الناس مثلي ضايعة؟
تمشي ولا تدري لوين؟
ابعتذر على السواد
لكن جبرني هالبعاد
اكتب قصيدي من رماد!
هاذي الشوارع خالية
ما مرّها من الناس احد
وهاذي الملامح بالية
ما مرّها شعورٍ ابد
يالناس يا اغلال من وجه وعيون
انا سجين الشكّ واغلالي الظنون!
الشمس قلبي والفكر شكّه ظلال
والناس تمثال من طين ورمال
ياخوفي لاصبح مثلهم
تمثال من طين ورمال..
ارضى السكوت
وارضى اموت..
ابعتذر على السواد
لكن جبرني هالبعاد
اكتب قصيدي من رماد.