طار الورق صاروا محبينك أغراب
ما عاد لأعشاشك عصافير.. وغصون
وإحساسك اللي في اشتعال السهر ذاب
كانت (شوارد) تشربه عشب.. ومزون
وكنت السنابل.. والأسماء.. والأصحاب
وكنت الجنون العاقل أف عقل مجنون
وعطر الرسائل.. وارتعاشات الأهداب
وهمس الهديل أف شرفة اللي يحبون
تزرع بيادر وحدتك ناس.. وأحباب
وتقطف بوادر طيبتك جمر.. وطعون
في غيبتك تنعس شبابيك.. وأبواب
ويموت شمع بسيرة العشق مفتون
وفي (صلح) أمل دنقل (وأناشيد) سياب
يسكنك هم.. وكنت بالهم مسكون
قلت أكتبك قبل العناوين تنساب
وقبل المدينة تسكنك قلب.. وعيون
صالح.. وينبت ضحك.. وأطفال.. والألعاب
وطيش وغنا فيروز.. (مش هيك بتكون)
صالح.. ويتشجر ورق توت.. وأعناب
ويلذ في غصن الحكايات ليمون
صالح.. وتتصالح مسافات.. وتراب
وأغراب في محراب نزفك يصلون
قلت أكتبك صار الورق عطر وثياب
والروح ترقص عارية في دفا اللون
وصار القلم عصفور.. وكفوفي أعشاب
وأصابعي طارت فراشات في الكون
وتسنبلت في غيمة الحرف الأسباب
وأثمر على بال الورق غصن زيتون
قلت أكتبك لأصاروا أحبابك أغراب
وطارت من أيامك عصافير.. وغصون