يا حسين قبل الفنا خذ مني الجزله
ذي خارطة كنز ابوك بداخل ابياته
ورث الذهب ما يفيد اللحية الرزله
والفقر ما عيّب اللي يحترم ذاته
ولا كل رغبات راعي المال تنجزله
كم رغبة(ن) بيدت حيله وحيلاته
انصحك عن طلعة(ن)تفجعك بالنزله
الكذب ما يحمد العاقل نهاياته
لا من تكلمت كب الهرجة الهزله
واذكر من الهرج دسماته وجزلاته
ومن بان في ثوب غيره حط في عزله
ويفضح قصير النظر كثر اتجاهاته
وياحسين لاجاز لك عقل الرجل جزله
وره حقيقة شعورك واطلع مرآته
وابعد عن الصاحب المشبوه واعتزله
تراك لو ماتتيه تشيل تيهاته
والنذل لو مت جايع لا تلزلزله
ارفع مقامك عن الواطي ومنّاته
ولا كل صاحب رخا بالضيق يعنزله
ياكثر ما تكتشف لا احتجت علاّته
وراع الحسد ما يخلي للحيّل غزله
لا يستثيرك بهمزاته ولمزاته
ترى سكوت الرجل لا زعّل اركز له
راع الحجا يذبح الحساد بسكاته