ليتك اللي مستشير(ن) لك بخيص
قبل تظلم غافل(ن) بك ما درى
مقفي(ن) قديت له دبر القميص
واتهمته بالردى محض افترى
كان عنده بالرجا تالي بصيص
قبل يجري له معاك اللي جرى
لين حديته على الكدر النغيص
ورحت تحرم ناظره لذْ الكرى
يوم شاف انك تسومه بالرخيص
وكل همّك تحرجه بين الورى
شال جرحه واحترف مثل القريص
من بعد ما السمْ بأطرافه سرى
يدري انه عنّك ابد ماله محيص
وشاهده غير يتعامى لو يرى
ضد بحر(ن) لا سبر غورة وغيص
قبل بتع (ن)ينفهق عنه ورى
وش يخيفك من بواريد القنيص
وانت لك في كل نايفة(ن) ذرى
يعترض من دونك الصعب العويص
ولا يطولك في ثرياك الثرى
عمر زود الحرص ما فاد الحريص
ومن تبرى من غوى نفسه برى
وأنت لو شاورت لك فطن(ن) بخيص
ما درى عن سرّك اللي ما درى