يسعد مسا اللي على الخفاق مر وسرى
سلم على هاجسي باحساس حيّاني.
به ينجلي همي اللي مايطيق الكرى
يبعث لي روح السعاده وايتغنّاني
فدوته قافٍ على طاريه خطّ وقرا
بحروف تفتزني وحروف تقراني
وفدوته زولٍ بعد ما راح حاله برى
وهو على شوفته ميّت وشفقاني
ماتنشرح غيبته واللي عليّه جرى
له مدةٍ في هجير الوجد خلاني
ولا يشره القلب دامه.. ما درى ما درى
الصمت هشّم ضلوع الصدر وابكاني
من كثر ما اغليه ما ودي يدوس الثرى
ياليته يطير.. ويحلّق.. علشاني
لبيه لبيه.. ياليته بعيني.. يرى
كم شوفته تروي عروقي وتزهاني
عليه من حرّ وقته غصن قلبي ذرى
يقطف عذوق الوفا كان الله احياني.
مانختلف فالظنون.. ان باع والا شرى
كلمه نطقها لساني.. تحفظ لساني