أمنت بخالق الكون الرحيب وما حواه أمنت
له الحمد وله الشكر وله الفضل وله المنة
ما غير الله عليم بحالي، إن أخطيت وإن أحسنت
ولا غير الله بيده العافية والنار والجنه
أنا واحد من المليار مسلم، زنت ولاّ شنت
عسى ظني بربي زين والمسلم على ظنه
أنا فالكون ذرّه من تراب الأرض مهما كنت
لكن الله هداني والتزمت الفرض والسنة
ولا يا هاجسي حضّر وهات الغايبة لاهنت
طرا لي ما طرا ورعود رأسي جالها حنه
أبا أبيشن ويسمعني ثقيل السمع لابيشنت
ولاني فاضي أعد أمسيات الصيف والكنه
ولا ياللي تناديني وتخفي صوتك، أنت إمن إنت؟
خلصنا والقرار الصادر أذانيك سمعنه
أنا صوتي طويل ليا رقيت المئذنة وأذنت
يلجن الجبال وكل وادي تختفي جنه!
ترى والله ما لومك لو قضى صبرك ولو حزّنت
حمسك الهم في ضلع الندامة حمسة البنه
ترى محدٍ درى بعلومك، إن أسررت وإن أعلنت
تون وكل ما قالو علامك، تخفي الونه
حبيبي يوم أراد الله وكونّاك، وش كونت
ورى قلبك نسي كل القلوب اللي يحبنه
بنينا لك بيوتٍ ما دخل فيها حجر وإسمنت
يذرّن الموفق، والملفق ما يذرّنه
ولعبنا لعبة البيلوت، من شأن الولد والبنت
على صن ودبل و(400) والصنة الصنة!