يا حي من بان للقاف وتبيّن له
هديته غالية من سوقها الغالي
شوارد الشعر ناداهن وشامن له
قالن سلام وتحية يا بعد حالي
هذا الصحيح وهذا قولي على حله
منطق فهد مثل ذوب السكر الحالي
وجه لي البيت يومني رفيقن له
يمدح رفيقه وهذا سلم الأبطالي
مدحه يشرف ولو ماني بقدله
ما شفت نفسي كبير ولا يورالي
ما ندعي بالكمال ولا نهرول له
هاذي صفة من صفات الواحد الوالي
يا طيّب الأصل يا راع الوفا كله
أشكرك مأمطر من الأمزان همالي
يا جارنا اللي طلباته يهونن له
على النقا والوفا والمذهب الغالي
يهمنا رضاك، نتعب له ونبذله
ما نملك من العلوم البيض والمالي
وسليم قيفٍ عريب وينعرف دله
والله ونعمٍ بهم في كل الأحوالي
بيت الشهامة يظلل من دخل ظله
وبيت الرخامة خفيف ولا له ظلالي
مواقف سليم معروفة بالأدلة
أفعال ماهيب سرد علوم وأقوالي
يا لكاسر الأول أنت العرف تحتله
من روس ربعك ولا به شك وجدالي
هذا الكلام الصحيح، اللي نبرهن له
قالوه كل العرب، ما قوله لحالي
الرجل ما ينطق إلا الصدق، وأجمله
الصدق له فالعرب تقدير وإجلالي
وأرجو السموحة عن النقص وعن الزلة
يا جالب الغالية في سوقها الغالي
قال الرياحي، وأخذ قوله وسلم له
على سليم الكرام شيوخ وعيالي