ف ليلة من لياليى
الف ليلة وليلة
ف اوضة بتجرى تحتها الانهار
ف القصر الكبير
احلوت حوا ف عين آدم
ارتبك ادم م اللى فيه
احساس جديد عليه
ومافيش غربان يتعلم منها
ازاى هذا الاحساس يواريه
دور آدم ف الاسماء
وف ضى ابتسامة رضا من الرب
اتكشف حجاب الحب
عن كتير من الاشياء
اتنهد آدم
وف بردة م الاحلام
اتعشى ونام
ماصحهوش
غير رعشة اندهاش حوا ف الولادة
وصوت صريخى تحتها
آدم وحوا مذهولين م الطرح
قلقانين م الفرح
وانا بصرخ وبصرخ
ومحدش فاهم بصرخ ليه
آدم يقول لحوا سكتيه
ننه هوه ننه هوه
وانا بصرخ ياهوه
من جوز الملايكه
اللى نطوا فوق كتافى وخدلوه
بالورق الفاضى الكتيييييييييييييير
اللى لسه هيكتبوه