مبقتش اخاف منك
غير بس لما بتسكتى
بحس بدوامات العشق
طيور بترقص
رقصة الموت الأخيره
احاول اهرب
تحت ضل الحمام
استنى اخر رول
ف محكمه الكلام
ألمحك لابسه الوشاح
يخرج سؤال منى
يشاورلى خوفك ع الحروف
وكإن عيسى بيتولد تانى
ويفتح بوابات الرجا
أدخل مداين رعشتك
وبدمى ارسم اخر امل فيّا
احضن قصيدتى
وتحت ديل جلابيتك
اتغطا زي الخلق
ومن تانى
حاجب المسرح يصحينى
يعدى طيفك برق
يخضر شجر الحياه
من تانى جوه الحلق
الكل يتكلم يتمتم
يكسر قيود الحلم ويعدي
الا قلبى
السلم الممدود لقلبك
ناقص درج كتير