المحمل الي طويت البارح شراعه
قمت الصباح وبحلني غبرة ركونه
الي حسبته بنومي ياعرب ساعه
اثره عمر يمضي ولاقلت وشلونه
حاولت اكب المكابر وافهق قناعه
لكن وجهي خذا من شكله ولونه
والدمعه الي ماسنّت للجفن طاعه
اليوم في غرة الفضّاح مسجونه
سلّم على الي لاضامه لايعٍ لاعه
ماضاق له غير نمرة قير صالونه
اليا هبد بنصه الي طايع طواعه
يم الخلا الي به الاسرار مدفونه
يامل قلبٍ هيام الفارقه ثاعه
نبع القصيد ومدوزن ريمة لحونه
الي لاجاني يفز القلب من قاعه
كن اسفهالة عروقه فيه مقرونه
ريم الفلا الي قصيدي مثقلٍ باعه
اردوعه الي تخلي البيض مغبونه
هو كيف شعري وخازن نار ولاعه
هو القنّب الي توزّا جوف غليونه
لا يا قراحٍ عليك الروح ملتاعه
شحّيت عن روية الضميان ياعونه
ترا وطاب الوليف ان كانه شعاعه
يبَل ريق الضمي من شوف ماعونه
ولا يا وجودي على قلبي ليا راعه
سوق المحبه وغرّ العشق وفنونه
ودي لو الي شريته يمكن ارجاعه
لَكَنّ سوق الهوى ماهو بقانونه
فحدٍ يوصي ف قلبي مجمل الباعه
اربهم لو ب (راحة بال) يشرونه