طرق ريح الصبا غصنٍ عليه المفردات جزال
وهبت بالحنين الي صبا في ميسرة صدري
ومالت بالفؤاد الي قبل لاتطرقه … مامال
وغنّا نايح الورقى بذكرى حبنا العذري
تدانو يا هل العِرف القديم ومضرب الامثال
انا ضيّفت لي حزنٍ وعيا الحزن لايسري
احن الراس من مجلس يجي في طيته معدال؟
او اني اطرده ويقل بعيون الكمد قدري
تداهمني احاسيسٍ بنت في داخلي تمثال
تعلّى شاهدٍ ضُمّن (هنا ارضي..هنا قبري)
ابيلي ترجمانٍ يعبد الواحد .. ولكن ضال
معي احساس يبغي ترجمة حَبْر يعرف عِبري
على الي خارفٍ قلبي وخلّف فالمحل خيال
سرابٍ ماهو بيُحضن ولا يُلمس ولا يغري
وعشقه القلب وارخى له من احبال الغرام حبال
لو ان قلبي شباريقٍ سببه وخاطري مفري
عسا ساموح وصل حبيّبك يامهجتي الارسال
لو الارسال مايعذر عطيتك من بعض عذري
ياكم مره دعيت الي رحايم مكرمته عجال
على اني اطري ببالك ربع مانك علي تطري
تعال واختلس نظره على قلب(ن) يحن هجال
يحبك مثل ما (مرْد الاراك) يلاوح القمري
انا لي قلب لو ينطق حلف بان الحسن محتال
ياكيفه يختزن جلّه بعين وعانق العفري
سلام الله على رمز الجمال الفاتن المختال
سلام(ن) لك فرض طاعة بني حواء فَرِض جبري
ياوجهٍ يجعل العاشق من الدهشه شرود البال
ياويش الي جعلك تفارق الكوثر وهو يجري؟
على كثر الكلام الي بقلبي .. ماعرفت احتال
بكلمة تختصر حبٍ كبر مستنزفٍ حبري
ف (احبك) ماهي بكلمه توفي عاشقٍ رجال
ولا (عمري) .. اخاف انه قريبٍ ينتهى عمري
علي من النذور الي نزول وعهدها مازال
وفوح دلال ينجحها من البارح سنا جمري
لغيرك مانظم شعري ولا غنى على الاطلال
ولا طوّع شياطين القصيد لطاعتي وأمري
عليك الحسن ياوجه المرام لخاطري يختال
يابدرٍ كل مايبغي التنحي قلت له بدري
تبختر يومك العارف لغيرك مانطحنا فال
ولارسلنا على عيافة خطاوي جرّته مرّي
يعيش القلب وانفاسه على ساعة لقاك طوال
واذا قَصْر النفس احيا شرايينه لضا صبري
ودعا ربك بجنح الليل قلبٍ للكرى ماسال
" ياربي اجعله مني لكي يشتد به ازري "
تعال ولك امان الله ماكن افراقنا قد طال
لك العاشق على خبرك مثل ماني على خبري
شفوقٍ لك واذا شافك تحفّى جيتك ثم قال:
ياكسري أبشر بجبري..ياكسري ابشر بجبري