على باب الغرام الي تحرى جيتي مشراع
وقفت آحسبه جمبي واثرني واقف لحالي
خفق قلبي ولاكذّب شعور الجايع اليا جاع
وغفا نور الامان الي يطمّن نايضه بالي
وزنازين الضلوع الي سكنها ثايرٍ ماطاع
صدح بن الظليمة مارضاها ربنا الوالي
وتزبّار الدموع الي يقول بخاطرٍ ملتاع
لاتنجح كيتي وانا بعد مانجحت دلالي
الا لبيه ياطيفٍ يجدد بالحنين اوجاع
لسانه قايلن والله لجدد فقدة الغالي
يحسب اني تعايشت الفراق ونكست الاوضاع
وانا كل ماسهت عيني يدنّ الشوق موالي
رعَ الله ياربيع القلب يومك للغضي مرباع
تلافحك الهبوب الي تسج بخاطرٍ سالي
يدلهك الهجوس الي لهزل المفردة ماطاع
وانا متراكيٍ في جال ضوي فااهق عقالي
على شوفة ربيبات البطون ومثقلات الباع
طفاح واللحى عاير شوامٍ حدها صالي
مفاهيق السنام سبالها تهزع ليا من ذاع
زِفافٍ لاندبها شايبٍ بالصوت وبّالي
تباريها مزاهيفٍ حوافرها تدك القاع
مواريقٍ نواصيها عليها الخير متّالي
عراً ماسرجت للي ماحمحم صوتها له ساع
تبي من ينزي وينزع لاقالت وين خيّالي
تسليني وتنسيني عن اغلى ماملكت وضاع
وعتابٍ لاطرت ذكرى فراق الخل يطرالي
كلاني بالحسوف الي تزود جرعة الاوجاع
لو انه يعرف المبلي ويستر خملة البالي
الومه؟ كيف! وذا قلبي عقب ماقد جرا ماباع
غرامه .. لو بقى هجره يعكّر صفوة ليالي
وقف ضدي وهو مثلي ضحية دمعةٍ ووداع
وخلٍ تصفق لفقده يميني راحت شمالي
سقى الله راحةٍ راحت من اجزاها ثلاث ارباع
وصفطانٍ لما دبّر .. بقا ربعٍ مايصفالي
تَخَطّفه الهموم خطاف ظبيٍ خاطفته سباع
جياعٍ مابهم قايل ياجالك وين من جالي
سقى الله يومك تحب القصيد الي عليك يذاع
ورحت ولابقى شعرٍ يصبرني ويبرالي
تعال يناشدك شعري شعوري ضايعٍ مرتاع
مابي صح الله لسانك .. ابيك تشوف وش حالي
شعورٍ مات في جوفي وقلبٍ من بعادك ثاع
تغنوا لاجلها احبابي وعدواني وعذّالي
لكنّي للعنا ماني ضعيفٍ خايرٍ مطواع
ولا لقلبي ولو عقبه ماعد به شي يبقالي
عليك الحل ياخلٍ ماسقت إلك القدم تباع
فانا من عزتي حتى ظلالي .. ماتبع ظلالي
فمان الله من رجلٍ على شوفك ضِمي طماع
لَكَن ماهو على عز وكرامة راسه يمالي