ابتدا ليلي وليلي فيه من حزني مواري
حالكٍ يزجر ولاله فالغداري من نديده
اكبر طموحي يلوح فعسعسه براق ساري
لو خياله الف فرسخ ولو تلعّاجه مكيده
اقصر الليل بقصيدٍ جاعله خطة طواري
لا لمحت هيال ولا سلطن الناي بنشيده
ولالفح من ليت دوني من طهافيّه مذاري
حزنن ينغص حياتن ماتكلت بالرغيده
حزني الي ماستكن الا وانا عالحزن ضاري
ماحلاه يروف غير الا علاقتنا وطيده
يقبل بشلفى تندي موت وحداد وعزاري
كنه الي قال جرحك ناقصه طعنه جديده
اتقوابه ولو هو سبة طيوف الطواري
ان تجلاني بغيضٍ وان تباطيته فقيده
صرت انا السلطان يومه صاير لي الانكشاري
لايفارق!! .. لكن الله يعلم اني ما اريده
سامحيني يالثريا على الهبوط الاضطراري
لازم الملم شتات القلب واشعم له وقيده
لاتّباطي .. لازم اني يوم بعوّد مداري
دربي الي عزم راسي حارص انه مايحيده
عزمي الي جاعلٍ شعري فريد ولا يجاري
غير ذاته يوم جاب ام الفرايد في فريده
طوّع الشعر ورفعه وصار له نِدم وحواري
ولعّب القيفان كنه يلعب الفيروز بيده
ذاك شعري الي سبب الهامه الي به يماري
من عليها تشهق انفاس الشعر لو هي بعيده
اعشقتني لين صرت ف حبها شبه انتحاري
ثم دلهت الشعر غازي لين نصبني عميده
شعري الي في كنف ظبيٍ تذيرها الضواري
اقلبت سحر المطارد ووثبت صوبه تصيده
ماحلاها من ذوات الحسن احرار وجواري
لو ترودع بالوشام ولو تمشي البيض سيده
ناولتني من شذا حانوتها خمرٍ نزاري
عيشتني سكرة العشّاق لحظات زهيده
غيبتبي بين هذرة كاهن وترتيل قاري
اعرجت بي لين شفت ان الدمشقي فالحديده
اه ياذاك الشعور الي عليه القلب هاري
نفسي الي ودها تدفع ثمنه وتستعيده
غير دون عيوني وقلبي ومرباعي وداري
حال ظلم الجد يومه ورّث الفرقى حفيده
مالقيت فابن مسلم واجتهادات البخاري
مايخرّج من (يميت الحب) دائرة العقيده
ليت لو نول الحبيبة بالثميدي والسواري
كان روّح لجل طارف عين مرباعي بديده
اتبصر وجهي الي مضعفه داء انكساري
للعرب .. ماكان يبصر كسرته نابض وريده
اتعبه كثر التحامل لين فري الروح فاري
والسعد فالقلب صفر من ورا حزنه رصيده
ياهجوسي لاتلوم الي يعنك للمساري
مالقا له غير حبلك تنقذه! ولا تبيده
مانكرته كيف سالي ما له الا الشعر طاري
مافضحت البسمه الي تستطنع بانها سعيده
كان تجهل فالمصيبه اكبر ان كنت انت داري
ليه عقب الفقد باقي احبك واسبك شريده؟
خايف اني لا اعف من الغزل واخلي مساري
يعلن القلب الممات وتدفنه آخر قصيدة