في عسعس من الليل والراس غاوي
شعرٍ خذا نظم الجزيلات له كار
راعيه مايرحم ولاهو بياوي
خذا شداد الشعر والعالم انظار
مع كل شطر يتل شطره عراوي
ويدق في نعش الشواعير مسمار
ماهو من الي ابتدا الشعر هاوي
الا من اول مابتدا استاذ شعار
نجمٍ ولاهو باي نجمٍ سماوي
خذا المجره طارشٍ دون مقرار
الين طن بمسمعه علم داوي
"بين الثرياء والقمر حاللٍ جار"
ياذا الجمال الي مايوصفك راوي
من ملحمة بابل ليا شعر بشار
طلت محيا قبلتك ماتساوي
الا بحورٍ أُوعدو فيهم ابرار
واما العيون الي كما للنداوي
مابقت من السحر للغيد قنطار
يابو العيون الي تجيها جلاوي
وتاخذك مخذ معرّب الجد للثار
ويامبسمٍ شهد العسل في راوي
ريقٍ مصفّى حايلٍ دونه جدار
رهايفٍ اليا بدت كن ضاوي
بدرٍ يشوق بضي قمراه سِمّار
والخد جمر الا فعل كي كاوي
ولافلا تفسير لمنادم النار
لوجهك الي يشبر الضي ناوي
يلغي وجود البدر وينير الاقطار
وياذا الجديل الي عذاب الشقاوي
والقذله الي مع هوا النود تحتار
دهمٍ دقاق مغلقاتٍ تراوي
لليل بانه ماخذٍ شعرها دار
وياعنق ظبيٍ شاق قلبٍ خلاوي
ماعس قفره قبلك عيون سبّار
النايد الي زايمٍ مايهاوي
الا لرب وعودةٍ لجله تدار
وياسير شقراء خاببه ماتلاوي
مشوالها الديباج لاخبخبت طار
على المهار تشن حرب وبلاوي
وعلى اليمين تسير والعالم يسار
وياريح مسكٍ خالط بماه جاوي
طيب العشيق الي ولاغيره اختار
لاهب نوده باب قلب الهواوي
طِيّب بخنة من عطى النود تذكار
ياماطرٍ دونك ربيعي سناوي
ياشوق عودٍ في رجاء ابنه البار
اشتاق لك وانا لشوفك شفاوي
لو المسافة بيننا بضعة امتار
ودي بصوتٍ جابرٍ للشقاوي
الي يعدك مشخصٍ فيك مابار
ماحرمو وصل الوله بالفتاوي
ولاعدّو الوصّال من زمر كفار
ارهي بصوتٍ فيه جل المناوي
للي يلاعب باشة الغيد باشعار
لعب الحصان ان جاء نهار العزاوي
ماهو بلعب ملاوح الايد للطار
عفيت عن وصف من الستر خاوي
يكشف تواصيفٍ عن الغير بستار
فان كان ماني في غرامك حماوي
ولافلاني من ضنا الشايب انمار