تبعثرت دهم الهجوس ولملمت بيض الحروف
وفكت على راسي طواري قافلٍ زرفالها
الين نارت واستباحت واستحلت وسط جوف
منهو تلاحق يلجم الي باقيه باقفالها
قامت تذكرني وانا الي مانسيت الها طيوف
ياكيف بنسى من بروحي باقيه اطلالها
انساك لاوالله فلاناسيك يالغر الهنوف
ماني بسالي وانت روحي فيك طال هجالها
مافات مات! الله يلعن من تعذر بالظروف
ياكيف مات الي عليه الروح تنطح فالها
مافات ماهو ميت الا في مغاليق الضعوف
اما الشجاع يموت دون وصالها وقبالها
يالايمي لافك من اللوعات والحسرات لوف
من لامني فالمهره الي هايمٍ خيالها
ماني قتيلٍ لاختلط عج الرمك ضرب السيوف
انا قتيل الي عيونه للبشر تغتالها
تلّت عراوي قلبي الي لجلها مسلم ولوف
واستسلم وخلا مكانه خاليٍ ثم جالها
صوّت له وابصر وقال ان كانك لك عينن تشوف
ماتقول جابه وانت شايف روحنا تبرالها
في دانيات من الثمار الي شمارخها قطوف
وفي نسل حوّا لين يارث ربنا اجيالها
ماخلق مثل ختام روحي والمئارب والشفوف
الزاهية لابيات شعري والشعر يزهالها
بنتٍ تفرّد بالوصوف الي مانادمها وصوف
ملها عشر ضرب اربعه ولاشبيه اخصالها
ياغرة كنها شليل البرق في عرض القنوف
وياجادلٍ كن الخراميس الغسف تجتالها
والعين فص زبرجدٍ في سرقة الناظر سروف
ماحن عينٍ تبصره من عارضٍ يشتالها
والصوت سحر موشّحٍ غنابها عبدالرؤف
وتلاوحه من لاعب الرعيان جر احبالها
وليا مشت ماتندرق واليا وقفت خورٍ عيوف
ملها شبيه الا القحوم الي كساها جلالها
اليا دبك حافر قطاها والحصا خلفه حذوف
كن الاراضي تنسفط لخلافها بجبالهاا
ياغايبٍ عني متى بيقصّر الفرسخ نكوف
وتهدّف سروح الغلا لو حرمت مقيالها
ترا زماليق الوله ماضرها كثر الشعوف
الي تشعّف بالنيا ل يمينها وشمالها
شروشها صملان قلب وساقيه دمٍ نزوف
وقطافها خنّة عبيرٍ فوح جمري طالها
لكن ماباقي ضلوعٍ تشعم النار اللهوف
مات الجمر والعين كض ركيّها اشهب لالها
والروح ماعادت تلضّى وإتّصبر للصدوف
الله يعلم بانها في حالةٍ يرثى لها
يبست يباس الشنّه الي مالحفها عهن صوف
ادنى قفاقيف الهبايب طنّبت موالها
تحدني يوم اتّلاجا عقب وسّام الحيوف
وانا اتصدد لو دموع العين بلت شالها
لكنها تدري وانا ادري لو عيوني ماتروف
شربت لاجله عذف موته غاليٍ فنجالها
حافظ لها شيٍ حفظته في تجاويف الرفوف
ولا بلا لو النيا طالت عليه ليالها
احبها حبٍ عفيفٍ مايعرفه فيلسوف
ولاقاسه الي ضاربٍ اعراضها فاطوالها
صلّى عليها الي سجد والي سعى والي يطوف
والي سكن في حيها والي فطم من آلها