عفى الله عن وجع ظلم الحياة وصدة الغالين
لونها ماقوة وجهي ولا عرّت تعابيره
كما هب الهبوب الي تصك جدار بيت الطين
لونها تصكه من سنين ماحتالت لتدميره
سلامي ياقصيدي لابدعت من الشعر بيتين
تهيض شاعرك قبل يتهيض له جماهيره
فانا الي نوض شعري لابرق غطا على الجالين
تبارق في سماء الابداع ماخلى ولاديره
خذيت الشعر رايح جاي وانا في اول العشرين
علي العار لادبلها …لحَبْك الشعر تقزيره
على بحر الحزن يوم العرب من غبته باكين
تجاوزت البحر بالمِحمل الي صبري يديره
اصارع موج وانطح ريح ولايغفى لعزمي عين
ولارسي في بلاد الحزن لاضفه ولاجزيره
وبداوة خاطري عيت على ذرفة دموع البين
فانا الي مربعه صبرٍ وغض الدامع قصيره
مادمعي هيينن فابكي ليا طروولي المقفين
انا من قوم دمع العين للرجال تعييره
رعاك الله ياراسٍ ليا جار الزمان تبين
على عيطا من الامجاد نارك فوق بنديره
ياكيف تضيق ياراسي وربك يقسم الصفيين
شجاعٍ مايفك لضيقته حتى ازاريره
قنيب الذيب في صدره يهيب عوسة الجفنين
ماخلاها من المربى تحرّك شبر وتسيره
وقلبه لو هفى قلبه ماشاور في جزاه اثنين
دفنه ولابكى فوقه وراح يدور لغيره
على باب الاماني ماوقفت ولا صفقت ايدين
ولو صبري يبي تفسير للي صعب تفسيره
اذا حلت شكرت الله وقلت العاقبه فالزين
واذا راحت حمدت الله واردد ربها خيره
بداخل قلبي كتام البسوس الي كلتني سنين
وجساس الحزن قلبي ماوقّف سطوته زيره
لكنّه ثابت وراسي ولالحقه بصبره لين
وقف وقفة شجاعن ناطحن حوّافه مغيره
سلام الله على قلبن صبر لمواجه الامرين
لو ان سيّور ماخفت على قلبي مقاديره
ورعاك الله ياقلب الشجاع المقدماني لين
يواريني الثرى والحق ابوي وطابت الجيره
يموت الشيّن وتفنى سيره موسّمه بالشين
ويموت الطيب وتبقى تردد خلفه السيره