هبت هبوب البعد مابين الافجاج
قلبي مريض ابعاد والله يجيره
انا زماني مال بي حيل وانعاج
والحظ دوراته عليّ مستديره
مافيه شين يحرجك ليه الاحراج
لا تقول مَقدر قول: صدفه وخيره
جالك نصيبك والقدر دايم افراج
لو شفت شره لازم يجيك خيره
ودعتك الله وافرح وزين التاج
ياجعل يزهى دربك اللي تسيره
نهيت كل اللي غدا فيك هراج
ما كنك الا في عيوني أميره
دعيت لك دايم ولاصرت بك ساج
لو ان نفسي من فراقك كسيره
من قبل احث خطاي وآجيك دواج
منيت نفسي وامنياتي فقيره
اشوفك بعيني ضوى ليل وسراج
لك بالمحاني الف ممشى وديره
قلي ياكيف انساك لاصرت منهاج
علمت قلبي وجهته مع مصيره
الوقت دونك ممتلي هم وازعاج
ازريت لا امشي خطوتينٍ قصيره
ياوجد عيني مالها طب واعلاج
ماتبغي اتناظر ولاشي غيره
اموت بك واحيى بقربك ومحتاج
قلبي مريض ابعاد والله يجيره
وشلون ابنسى دلني عنك مخراج
يا احلى غرامٍ وابتدا من اخيره