ذبحني هالسؤال أرجوك قلي بس وش جابه
دخيلك ليه تتعمد مع ضحكك تبكيني ؟؟
من البارح تعيده هالسؤال وتطرق أبوابه
وعلى نفس الطريق اللي تجي منه توديني
ياأخي وش تبي مني وحزني وش تلقابه
يهمك إيش في هذا ؟ عذابي وإنخلق فيني
تبي تعرف حكاية شاعر ٍ جمهوره أحبابه
تبي تعرف يصفق ليه جمهوري ويحييني ؟
لأن الشعر عندي ماهو بس أوراق وكتابه
ولاني من فراغ أكتب وأبي تكثر دواويني
تبي تعرف شاعر ليه؟؟ هاك الشعر وأسبابه
تبي تعرف مكاني وين ؟؟رتبّها وتلاقيني
فقر مال وفقر حال وفقر حيله وطلابه
فقر حظ ٍ كريم أمدلّه كفي ويعطيني
فقر دين وفقر دنيا وجوع ٍ تنهش أنيابه
فقر راحه وفقر صحه وفقر فرحه تنسيني
فقر أيه الفقر يعني ضياع العمر وركابه
فقر يعني فقر يعني عذاب وضيم ماليني
وراس الفقر وراس الجوع وعمر طارت أسرابه
وحق الدرهم اللي مانوى مره يخاويني
رضعت الويل من صغري ولبست الحزن وثيابه
على شط الشقا مولود وهمي كان يرويني
تقطع وجهي وجلدي بناب الفقر ومخلابه
ولكني عزيز النفس ولو أحتاج تغنيني
كساني ثوبي المشقوق وبين الناس أزهابه
وكل ٍ يلتفت يمي يظن بتنكسر عيني
حشا ماتنكسر عيني وأنا اللي وقته يهابه
عزاي أني فقير وصارت النظرات ترميني
عيون الناس تطعني وكل ٍ يغرس أحرابه
وبعض عيون أقدرها وبعض عيون تدميني
وشلي مابعد قلته وتبغى تعرف أعرابه
مضت ساعات أتكلم وأنته بس توحيني
تبي تعرف حكاية عشق وبنت ٍ حيل لعابه
تبي تعرف عن أسباب الجفا مابينها وبيني ؟؟
تخيل جتني وقالت فمان الله يابابه
تشرفنا بمعرفتكويالله لاتأذيني
وأنا أعشقها ثمان سنين وهي (تلعب وكذابه)
تسلي نفسها فيني ونيتها تخليني
تبي تعرف حكاية قبر وطفله تسكن ترابه
تبي أقولك مظلوم ودّم الطفله بيديني
تبي تعرف وش الغربه ومن اللي طول غيابه
تبي أحكي قبل أعوام بالتفصيل أنا ويني ؟؟
تبي أحكي لك عن الزاهد وعن ذنبه في محرابه
دخيلك ماأقدر أتكلم خلاص أرجوك أعفيني
قسم بالله في صدري مدينه تلتحف غابه
مدينه ساكنه قلبي وغابتها شراييني
دخيلك سكر الموضوع وشف لك شي تسلابه
أنا منك ألاقيها أو ألقاها من سنيني