الشعر نزف الفكر عزف الحبر ترنيمة إحساس
والبال غصن وحروفي طير وشجوني اغاني
شاعر وجيت افتح لصمتي كلام احرر اقواس
لين اروي أرض الورق من بوحي وتنبت عشاني
غريب دنياي صحرا قاحله كم جيت عسّاس
رغم انكساري اتمتم ليتني اوصل عساني..
لشي واحد يحدد موقعي.. مليت محتاس
مليت عابر ودربي ضيق.. خطواتي تعاني
الليل طاغي سواد وخوف يتملكني أنفاس
وأنا لوحدي سوى الحيره تخيم في مكاني
اهز جذع الأماني من عبث يتساقط الياس
والعمر عَدّت سنينه.. ماعرف طعم الأماني
أستنبت من الصبر كذبة طموح اقول لاباس
مالي سواه الصبر.. لاضاقت وكشر زماني
اشكي لمن يازمن؟ للناس؟ قُلٍّي هو بقي ناس
تربت بأيادي رحيمه تحتضنك بصدر حاني؟
دنياي موجٍ وحظي مركب بغبة بلا قياس
حاولت اجدف وريح الواقع الهوجا تعَصاني
عشت الهلاك بفكر خاوي يعاني عجز وإفلاس
غريق وين النجاه وويني؟.. ووين المواني؟
ياوقت مدري ومدري كنها بالصدر وسواس
أو كنها اللانهايه.. بالوصول أعود ثاني
باقي كذا ارسم أحلامي عبث والبوح كراس
يمكن اجسد فرح.. ياحظ ساعدني عشاني