يا وطنى
من الشعر الشعبى السودانى
والله يمين يا وطنى
ما منك شين يا وطنى
ولا ذيك زين يا وطنى
فى قلبى دفين يا وطنى
وفى عقلى مكين يا وطنى
بطراك سنين يا وطنى لى يوم الدين يا وطنى
خليك قريب يا وطنى
ما إنت حبيب يا وطنى
لجروحى طبيب يا وطنى
آمال ما تخيب يا وطنى
ليه أبقى غريب يا وطنى
ما دمت ربيب يا وطنى وفى جوفى حليب يا وطنى
الله الله يا وطنى
من حرقة آه يا وطنى
محبوبك تاه يا وطنى
فاقد لهناه يا وطنى
ما إنت رضاه يا وطنى
فخره وعلاه يا وطنى صبحه ومساه يا وطنى
مشتاق مشتاق يا وطنى
زادت أشواق يا وطنى
يكفينا فراق يا وطنى
ملء الأحداق يا وطنى
دين فى الأعناق يا وطنى
وحب فى الأعماق يا وطنى قبلات وعناق يا وطنى
ليه الأيام يا وطنى
تفرقنا أعوام يا وطنى
تبعدنا دوام يا وطنى
نحيا الآلام يا وطنى
سلبتنا غرام يا وطنى
نستنا أحلام يا وطنى ما عدت أنام يا وطنى
ما إنت حنين يا وطنى
حجا المسكين يا وطنى
كحل عينين يا وطنى
فيك الوالدين يا وطنى
أحباب وبنين يا وطنى
وقبور صالحين يا وطنى أقاموا الدين يا وطنى
شاعرك محتار يا وطنى
فى صدره النار يا وطنى
غناك أشعار يا وطنى
وعزفك أوتار يا وطنى
فى ليل ونهار يا وطنى
رغم الأسفار يا وطنى وقسوة أقدار يا وطنى
سلامى أقريك يا وطنى
وشعرى يغنيك يا وطنى
فى دمى شريك يا وطنى
ما بخلت عليك يا وطنى
بالروح بفديك يا وطنى
ومعلق بيك يا وطنى روحى تناديك يا وطنى