هبّ الفراق وشلّع القلب تشليع
وحرّك اغصان الوله والحنيني
ياراحلة حطّي على الجرح توقيع
يمكن مساحات الالم تحتويني
ثم ارحلي في صمت من دون توديع
حتّى توارى ثورة الشك فيني
في عالم النسيان خليني اضيع
وان ضعت احذّرك انّك تدوريني
عسى الفراق يحلّ كل المواضيع
واشعر بقيمة مابقي من سنيني
الحب ياعذب اللما صار تجميع
هندي وبنقالي وكوري وصيني
اليا بدا للشمس في ساعة يميع
ويذّبل وكنّه زهرة الياسميني
ماعاد ينفعله صيانه وتلميع
اليا قسا عوده قسا مايليني
احلامنا ياراحلة ذبّت الريع
ناديتها لكن أبتْ تحتريني
كنّا سوى نارد عذّي الينابيع
ايام ودّك كل شي في يديني
واليوم ماينفع لماضيك ترجيع
صعبة تلدّ الشوف للخلف عيني
شمّعت قلبي عن هوى الزيف تشميع
بالشمع الاحمر والقفل ياظنيني
واليا عصاني لاعْرضه غصب للبيع
وابيع بأوّل سوم لو بريليني